વિ. સં. ૧૯૯૧ (ઇ. સ. ૧૯૩૫), ચૈત્ર સુદ ૧૩, ભગવાન મહાવીર જન્મકલ્યાણકના દિવસે ‘સ્ટાર ઑફ ઇન્ડિયા, સોનગઢ’માં શ્રી પાર્શ્વપ્રભુના ચિત્રપટ સમક્ષ પરિવર્તન કર્યું, સંપ્રદાયનો ત્યાગ કરી પોતાને દિગંબર જૈનધર્મના શ્રાવક ઘોષિત કર્યા. આ મહાપાત્ર આત્મા… વૈરાગી મહાત્મા… ઉગ્ર પુરુષાર્થી મહત્પુરુષ કોણ છે? એ છે પૂજ્ય સદગુરુદેવશ્રી કાનજીસ્વામી કે જેમણે વીરશાસનનો ઉદ્ધાર કર્યો, પ્રભાવના કરી.

એ સમયે સૌરાષ્ટ્ર ક્ષેત્રમાં દિગંબર ધર્મનું જૂજ પ્રમાણમાં અસ્તિત્વ હતું અને એ પણ કેવળ ક્રિયાકાંડમાં રાચતો હતો. સંપૂર્ણ જૈન સમાજ અધ્યાત્મથી અનભિજ્ઞ અજ્ઞાન અંધકારમાં ડૂબેલો હતો. પૂર્વ સંસ્કારના બળે, પરમ સત્ય તત્ત્વની પૂર્ણ શ્રદ્ધા – વિશ્વાસથી, પોતાના વારંવાર ઊંડાણપૂર્વક અભ્યાસ તથા જ્ઞાન વૈભવથી અને અપ્રતિમ શૌર્યથી પૂજ્ય ગુરુદેવશ્રીએ લુપ્ત થઈ ગયેલા સનાતન દિગંબર જૈન ધર્મનાં સત્ય તત્ત્વોને નીડરતાથી પ્રગટ કર્યા, પ્રકાશિત કર્યા અને લાખો ભવ્ય જીવો અને આવવાવાળી અનેક પેઢીઓનાં આત્મકલ્યાણમાં નિમિત્તરૂપ બન્યા. સત્ય તત્ત્વ પ્રભાવનાની સરિતા વહેવરાવી અને જાણે અંધકારમય પંચમ કાળમાંથી ધર્મ પ્રભાવનાનો ચોથો કાળ લાવ્યા. સોનગઢ સૌરાષ્ટ્રની ધરાનું અધ્યાત્મ તીર્થ બની ગયું અને પ્રભાવનાની ગંગા શરૂ થઈ. આ પ્રભાવના પ્રવાહના ઘટનાઓના ક્રમ અને સમય નીચે પ્રમાણે હતા.

વિ. સં. ૨૦૪૧ (ઇ. સ. ૧૯૮૫)માં શ્રી આદિનાથ આદિ ભગવંતો તેમ જ ‘શ્રી દિગંબર જૈન પંચમેરુ નંદીશ્વર જિનાલય’માં બિરાજમાન શાશ્વત જિનવૃંદોની પાવન પધરામણી થઈ. તદુપરાંત સોનગઢમાં મુમુક્ષુ માટે આધુનિક સગવડતાવાળી તથા સુંદર-સાત્વિક ભોજન મળી રહે તે માટે સમિતિ તરફથી અતિથિ ભવન અને ભોજનાલય બનાવવામાં આવ્યા. સુવર્ણપુરી અધ્યાત્મ તીર્થધામ બની ગયું છે કે જ્યાં પૂજ્ય ગુરુદેવશ્રીએ ૪૫-૪૫ વર્ષ સુધી તત્ત્વરસઝરતી અમૃતવાણી વરસાવી અને ત્યારબાદ પૂજ્ય બહેનશ્રીએ પણ તત્ત્વચર્ચા દ્વારા ૧૦ વર્ષ સુધી મંગલવાણીનું રસપાન કરાવ્યું. બંને જ્ઞાનીઓની સાધનાભૂમિ સુવર્ણપુરી ‘અનુભવ આરાધનાધામ’ તરીકે પ્રખ્યાત છે અને લાખો મુમુક્ષુઓ તેનો લાભ લઈ રહ્યાં છે.

જ્યાં સૌરાષ્ટ્ર પ્રદેશમાં દિગંબર જિનાલયો જૂજ હતા ત્યાં પૂજ્ય ગુરુદેવશ્રીના શુભ હસ્તે શુદ્ધ તેરાપંથી આમ્નાય અનુસાર દિગંબર જિનાલયોની ૩૩ પંચકલ્યાણક પ્રતિષ્ઠા તથા ૩૩ વેદી પ્રતિષ્ઠા થઈ. સૌરાષ્ટ્ર અને ભારતભરનાં અનેક શહેરોમાં જિનાલયોના નિર્માણ થયા અને ભારતદેશની સીમા ઓળંગીને આફ્રિકા – કેન્યામાં પણ પૂજ્ય ગુરુદેવશ્રીના પવિત્ર કરકમળે પ્રતિષ્ઠા થઈ. અનેક શહેરોમાં મંડળો સ્થપાયા અને તત્ત્વજ્ઞાનની ચર્ચા – શિબિરોનો પ્રવાહ શરૂ થયો – જાણે તીર્થંકરવત પ્રભાવનામાં ચોથા કાળનું આગમન થયું ન હોય! પૂજ્ય ગુરુદેવશ્રી તથા તદભક્ત પૂજ્ય બહેનશ્રીની સમાધિ બાદ એટલે કે શ્રી પંચમેરુ નંદીશ્વર જિનાલયની પ્રતિષ્ઠા બાદ, વિ. સં. ૨૦૪૧ (ઇ. સ. ૧૯૮૫) થી વર્તમાન સમય સુધી પૂજ્ય ગુરુદેવશ્રીના પ્રભાવનાયોગમાં તથા તેમના દ્વારા પ્રરૂપિત તત્ત્વજ્ઞાનને સમર્પિત અનેક ધાર્મિક સંકુલો, જિનમંદિર નિર્માણ, પંચકલ્યાણકો તથા વેદી પ્રતિષ્ઠાઓ દેશ-વિદેશમાં સંપન્ન થઈ. તેના સમાચાર તત્કાલીન પત્ર-પત્રિકામાં પ્રકાશિત થયા હતા અને ત્યાંથી પ્રાપ્ત કરી શકાય છે.

આજ શૃંખલામાં આ સુવર્ણપુરીમાં શ્રી બાહુબલી મુનીન્દ્રની ખડ્ગાસન પ્રતિમા સ્થાપવી અને જમ્બૂદ્વીપની રચના કરવી જેથી આ ક્ષેત્ર જૈનોનું મહત્ત્વનું તીર્થધામ બની શકે એમ નક્કી કર્યું. શ્રી બાહુબલી મુનીન્દ્ર (૫૦ ફૂટના કૃત્રિમ પર્વત સહિત) તથા જમ્બૂદ્વીપસ્થિત સુદર્શનમેરુ જિનાયતનની કુલ ૯૧ ફૂટની ઊંચાઈ પૂજ્ય ગુરુદેવશ્રી કાનજીસ્વામીના ૯૧ વર્ષના જાજવલ્યમાન, કીર્તિમાન જીવનની પ્રદ્યોત જ્યોતિના સ્મૃતિરૂપે રાખવાનું નક્કી થયું. પશ્ચાત ટ્રસ્ટે જમ્બૂદ્વીપ શાશ્વત જિનાયતન અને ધ્યાનસ્થ બાહુબલી મુનીન્દ્રની પ્રતિમાનું નિર્માણ પ્રારંભ કર્યું. સંકુલની પૂર્ણતા નિકટમાં જોતા તારીખ ૧૯-૦૧-૨૪ થી ૨૫-૦૧-૨૪ સુધી શ્રી આદિનાથ દિગંબર જિનબિંબ પંચકલ્યાણક પ્રતિષ્ઠા મહોત્સવ ઉજવવો અને ૨૬-૦૧-૨૪ના દિવસે શ્રી બાહુબલી મુનીન્દ્રનો મહામસ્તકાભિષેક અને નૂતન પ્રતિષ્ઠિત ભગવંતોનો પણ અભિષેક કરવો એમ નક્કી કર્યું. આ મંગળમય મહોત્સવ ઐતિહાસિક અને આનંદપૂર્વક રીતે સંપન્ન થયો. તેની વિગત આપણે જાણીએ…માણીએ…