શ્રી અમિતભાઈ શાહ

કેન્દ્રીય ગૃહમંત્રી

પ્રતિષ્ઠા મહોત્સવમાં હાજર જનમેદનીને સંબોધતા શ્રી અમિતભાઈએ કહ્યું કે “શ્રી કાનજીસ્વામીના જ્ઞાન અને આચરણનો લાભ અનેક લોકોએ લીધો છે. તેઓ માત્ર જૈન નહીં પણ જૈનેતર લોકોના જીવનમાં પણ પરિવર્તન લાવ્યા છે.” તેઓએ વિશ્વાસ દાખવ્યો કે સોનગઢ એ જૈન નહીં પણ જૈનેતરોના પણ આત્મકલ્યાણ માટે તીર્થસ્થાનની ભૂમિકા નિભાવશે અને આવનારા સમયમાં સોનગઢ ગુજરાતના અધ્યાત્મ કેન્દ્રોમાં અગ્રગણ્ય સ્થાન પ્રાપ્ત કરે એવી આશા સહિત એમનું વક્તવ્ય પૂરું કર્યું.

શ્રી ભુપેન્દ્રભાઈ પટેલ

ગુજરાતના માનનીય મુખ્યમંત્રી

સુવર્ણપુરીમાં પધારીને ભુપેન્દ્રભાઈએ ઉદ્ગાર વ્યક્ત કર્યા કે “ક્ષણિક સુખમાં ફસાયેલો માનવી મોક્ષમાર્ગમાં અટકી ગયો છે” … “બીજે બધે નહીં પણ અહીં આવીએ એટલે મોક્ષની વાતો થાય છે”. ઐતિહાસિક રાજા-મહારાજાઓને યાદ કરીને ભુપેન્દ્રભાઈએ વર્તમાન ભૌતિકવાદને નિરર્થક જણાવી જૈનધર્મમાં મુનિ દીક્ષા અને મોક્ષના માર્ગને જ સાર્થક બતાવ્યો.

શ્રી પિયુષભાઈ ગોયલ

માનનીય કેન્દ્રીય મંત્રી

માનનીય કેન્દ્રીય મંત્રી શ્રી પિયુષભાઈ ગોયલ સભાને સંબોધન કરતાં સૌ પ્રથમ ણમોકાર મંત્રનું સ્મરણ કર્યું. સોનગઢ ટ્રસ્ટના પ્રમુખશ્રી, સચિવશ્રી, સમસ્ત ટ્રસ્ટીગણો અને મુમુક્ષુઓનું અભિવાદન કરી “પૂજ્ય ગુરુદેવશ્રીની કાનજીસ્વામીની સાધનાભૂમિ સોનગઢ એક મહત્વનું અધ્યાત્મિક કેન્દ્ર બની રહ્યું છે” એમ ભાવના વ્યક્ત કરી તેમને સૌને શુદ્ધાત્મા સત્કાર પાઠવ્યા.

પોતાનું વક્તવ્ય શરૂ કરતાં તેમને જૈન ધર્મની તથા સાધર્મીઓની પ્રશંસા કરતા જણાવ્યું કે “અધ્યાત્મ, સત્ય, અહિંસા, સામાજિક નિર્માણ, સેવા તથા સ્વચ્છતાના ક્ષેત્રોમાં જૈનોનું અતિ મહત્વનું યોગદાન છે.”

શ્રીમદ્ રાજચંદ્રજી અને મહાત્મા ગાંધીને યાદ કરતાં તેમને જણાવ્યું કે “મહાત્મા ગાંધી શ્રીમદ્ રાજચંદ્રજીને પોતાના ગુરુ માનતા હતા અને તેમના ઉપદેશ પ્રમાણે સમગ્ર ભારતવર્ષના સ્વતંત્રતા અભિયાનને તેમને અહિંસામય સ્વરૂપ આપ્યું હતું.”… વક્તવ્ય પૂર્ણ કરતાં વીતરાગ દેવ-શાસ્ત્ર-ગુરુ, પૂજ્ય ગુરુદેવશ્રી કાનજીસ્વામી તથા પૂજ્ય ભગવતી ચંપામાતને શુદ્ધાત્મા વંદન કરતાં તેમને ફરી ફરી સોનગઢ આવવાની ભાવના ભાવી.

શ્રી હિતેનભાઈ શેઠ, શ્રીમતી દીપાબેન શેઠ (સૌધર્મ ઇન્દ્ર – શચિ ઇન્દ્રાણી )

મુંબઈ, મહારાષ્ટ્ર

વીતરાગ દેવ-શાસ્ત્ર-ગુરુ, પૂજ્ય ગુરુદેવશ્રી કાનજીસ્વામી તથા પૂજ્ય બહેનશ્રી ચંપાબેનના પુનિત પ્રભાવના યોગમાં સંપન્ન થયેલ શ્રી આદિનાથ દિગંબર પંચ કલ્યાણક પ્રતિષ્ઠા મહોત્સવમાં અમને શ્રી ઋષભદેવ તીર્થંકરના સેવકરૂપે સૌધર્મ ઇન્દ્ર તથા શચિ ઇન્દ્રાણીનું પદ પ્રાપ્ત થયું. આ લાભની પ્રાપ્તિ બદલ અમે ટ્રસ્ટના આભારી છીએ. રજતની પ્રતિમા શ્રી ઋષભદેવ ભગવાનરૂપે પંચકલ્યાણકપૂર્વક પરિવર્તિત થવાનો સૌથી નજીકનો અનુભવ અમને પ્રાપ્ત થયો. આ અમારા જીવનની અમૂલ્ય અવિસ્મરણીય નિધિ છે. હવે તો એક જ ભાવના શેષ છે કે અશુદ્ધ પરિણતીથી કલ્માષિત અમે નિજ સ્વભાવનો આશ્રય કરી સાધ્ય એવી સિદ્ધદશાને પ્રાપ્ત કરીએ. ઈતિ શિવમ…

जो संसार विषैं सुख होता, तीर्थङ्कर क्यों त्यागैं।

काहे को शिवसाधन करते, संजम सों अनुरागैं॥

શ્રી પ્રદીપભાઈ કામદાર, શ્રીમતી મીનલબેન કામદાર (માતા-પિતા)

સોનગઢ, ગુજરાત

અહો! ધન્ય ભાગ્ય અમારા કે અધ્યાત્મનગરી સુવર્ણપુરીની ધરા પર આયોજિત પંચકલ્યાણક પ્રતિષ્ઠા મહોત્સવના સાક્ષી અમે શ્રી ઋષભદેવ તીર્થંકરના માતા-પિતાના રૂપે રહ્યા. અમારું મન તો એમ અનુભવીને જ રોમાંચિત હતું કે શ્રી બાળ ઋષભદેવ સાધના-આરાધનાના પથ પર અગ્રેસર થઈને મોક્ષ પ્રાપ્ત કરીને શ્રી ઋષભદેવ ભગવાન થયા. શ્રી ઋષભદેવની બાલ્યકાળની ગંભીરતા, યુવા અવસ્થાનો વૈરાગ્ય અને દીક્ષા બાદ પુરુષાર્થ, પવિત્રતા અને સંયમ અમે અનુભવ્યા. શ્રી ઋષભદેવની આવી લાભદાયી, મંગળકારી, કલ્યાણકારી અને પ્રેરણાદાયક ગુણવત્તાઓ અમારા જીવનમાં પણ શીઘ્ર-અતિશીઘ્ર પ્રગટે એવી મંગળ ભાવના છે અને નિજ સ્વભાવના લક્ષે પૂર્ણ હિતકારી એવી સિદ્ધ દિશાની પ્રાપ્તિ કરીએ એવી ઉત્તમ ભાવના સાથે આ તકે અમે ટ્રસ્ટના આભારી છીએ.

પં. સુભાષભાઈ શેઠ ( પ્રતિષ્ઠાચાર્ય )

વાંકાનેર, ગુજરાત

પંચકલ્યાણક પ્રતિષ્ઠા મહોત્સવ એ આત્માથી પરમાત્મા બનવાનો એક અનેરો અને જીવંત પ્રસંગ છે જે તીર્થંકર ભગવંતોનું જીવન આપણી સમક્ષ જાજવલ્યમાન કરી નાખે છે. જેવી રીતે બાળ તીર્થંકર ગળથૂથીથી શુદ્ધાત્માના અનુભવ સહિત છે, એવી રીતે આપણે પણ સ્વભાવથી જ પરમાત્માપણાની શક્તિ સહિત જ છીએ. તેમ છતાં તીર્થંકરનો જીવ જેવી રીતે પોતાની સાધનાની પૂર્તિ કરવા માટે અડગ મુનિદશા ધારણ કરીને પોતાના શુદ્ધાત્માનું લક્ષ કરી કેવળજ્ઞાન દશામાં વિરાજમાન થાય છે, એવી રીતે આપણે પણ નિજ શુદ્ધાત્માનું લક્ષ કરીને તેની અડગ સાધના દ્વારા તેમાં પૂર્ણપણે લીનતારુપ વિરાજમાન થઈએ તો આપણે પણ પરમાત્મા સ્વરૂપ પ્રગટ કરી શકીએ છીએ. આવી એક અદભુત ઘટના દર્શાવતો પંચકલ્યાણક પ્રતિષ્ઠા મહોત્સવનો પ્રસંગ બધાએ વિધિ વિધાનપૂર્વક માણ્યો, એ આ કળિકાળનો એક અદભુત લાહ્વો છે. આ પ્રસંગ દ્વારા આપણે આત્મહિતમાં અગ્રેસર થઈએ એવી મંગળ ભાવના.

બ્ર. પં. હેમંતભાઈ ગાંધી ( સહ – પ્રતિષ્ઠાચાર્ય )

સોનગઢ, ગુજરાત

શ્રી આદિનાથ દિગંબર જિનબિંબ પંચકલ્યાણક પ્રતિષ્ઠા મહોત્સવ (પંચકલ્યાણક પ્રતિષ્ઠા) ભવ્ય જીવોના કલ્યાણ માટે એક અનુપમ, અદ્વિતીય અને અપૂર્વ મહોત્સવ છે. આ મહોત્સવ મોક્ષ પ્રાપ્તિ માટે કારણભૂત જ્ઞાન અને વૈરાગ્યપ્રધાન વિધિનું પ્રદર્શન અને જિનધર્મ પ્રભાવનાનો મહોત્સવ છે. તીર્થંકર પરમાત્માના પંચકલ્યાણકો અન્ય જીવો માટે પુરુષાર્થ-જ્ઞાન-વૈરાગ્યનું પ્રેરક નિમિત્ત બને છે માટે તેમને કલ્યાણક કહેવામાં આવે છે. પંચકલ્યાણક પ્રતિષ્ઠા દરમ્યાન જેટલા પણ પ્રસંગો ઉજવવામાં આવે છે તે ચારેય અનુયોગોનું પ્રતીક છે. પંચકલ્યાણક પ્રતિષ્ઠા મહોત્સવ એક એવો મહામંગળકારી અવસર છે જે જીવને પામરથી પરમાત્મા અને સંસારીથી સિદ્ધ બનવાની પ્રેરણા આપે છે. વાસ્તવમાં પંચકલ્યાણક પ્રતિષ્ઠાના બે પ્રકાર છે – એક નિશ્ચય પંચકલ્યાણક અને બીજું વ્યવહાર પંચકલ્યાણક. કોઈપણ ધાર્મિક અનુષ્ઠાનમાં પરિણામોની વિશુદ્ધિનું વધવું એ તો એક સહજ ફળ છે જ પણ જો આ વિશુદ્ધિના સમયે કોઈ જીવ પોતાના નિજ ભગવાન આત્માની ઊંડી રુચિથી ‘હું આત્મા છું’ એવો દ્રઢ નિશ્ચય કરી લે તો તેમને પોતાનો આત્મા પ્રાપ્ત થઈ શકે છે. આ પંચકલ્યાણક પ્રતિષ્ઠા મહોત્સવ આત્મભાવનાની અભિવૃદ્ધિનું એક સર્વોત્‍કૃષ્ટ નિમિત્ત કારણ બને એવી મંગળ ભાવના…

પંડિત શ્રી સંજયભાઈ જેવર (મંચસંચાલક)

મુમુક્ષુ આશ્રમ, કોટા

વીતરાગ દેવ-શાસ્ત્ર-ગુરુ; પૂજ્ય ગુરુદેવશ્રી તથા પૂજ્ય બહેનશ્રીની નિશ્રામાં સુવર્ણપુરીનું સંપૂર્ણ વાતાવરણ અધ્યાત્મથી મહેંકી રહ્યું છે. આવાં સુવર્ણપુરીમાં ૩૮ વર્ષ બાદ પ્રતિષ્ઠામાં સેવા કાર્ય મારા જીવનનું મહા સૌભાગ્ય છે. સુવર્ણપુરી પ્રતિષ્ઠા મહોત્સવના મંચસંચાલનનું આમંત્રણ જેવું મને પ્રાપ્ત થયું, તેવો મારી ખુશીનો પાર ન રહ્યો; મને થયું કે મારા જન્મ-જન્મના ભાગ્ય જાગી ઉઠ્યા. મહોત્સવનું પૂર્ણ સંચાલન પ્રભુ ભક્તિ, પૂજ્ય ગુરુદેવશ્રી અને પૂજ્ય બહેનશ્રીની ભક્તિના ફળ સ્વરૂપ નિર્વાંછકભાવથી કરવામાં આવ્યું હતું. સુવર્ણપુરીની પ્રતિષ્ઠામાં એવો અહેસાસ થતો હતો જાણે કે પૂજ્ય ગુરુદેવશ્રી સ્વર્ગથી નિહાળી રહ્યા હોય તથા પૂજ્ય ગુરુદેવશ્રીના ભવતાપહારી પ્રવચન સાંભળવાથી તો એવું લાગતું હતું જાણે સમવસરણમાં દિવ્યધ્વનિ સાંભળતા હોઈએ!

મંચની દરેક પ્રસ્તુતિઓ સાક્ષાત્ પંચકલ્યાણકનું દૃશ્ય રજૂ કરી રહી હતી. મહોત્સવના ચારે બાજુ સાધર્મીઓના આગમનથી એમ પ્રતીત થતું હતું કે જાણે ચારે નિકાયના દેવ-દેવીઓ પંચકલ્યાણક મનાવવા આવ્યા હોય. જાણે કોઈ અદૃશ્ય શક્તિ પ્રતિષ્ઠા મહોત્સવની રક્ષા કરી રહી હતી ત્યારે જ સંપૂર્ણ પ્રતિષ્ઠા મહોત્સવ પ્રસન્નતાપૂર્વક વાતાવરણમાં સાનંદ સંપન્ન થયો. ભવ્ય અયોધ્યા મંડપ સાક્ષાત અયોધ્યાની યાદ અપાવે તેવો હતો. આવવા-જવાની, આવાસ, ભોજન, સાફ-સફાઈ આદિ વ્યવસ્થા એવી સુંદર રીતે કરવામાં આવી કે જાણે સ્વયં કુબેર જ વ્યવસ્થા કરી રહ્યા હોય.

હું સોનગઢ ટ્રસ્ટના પ્રમુખ, સેક્રેટરી તથા સર્વ ટ્રસ્ટીઓને મારા શુદ્ધાત્મ વંદન પાઠવું છું કે મારા જેવા અલ્પજ્ઞને આ મહાન પ્રતિષ્ઠાના મંચસંચાલનને યોગ્ય ગણ્યો. આ દાયિત્વને પાર પાડવામાં થયેલી ક્ષતિઓની હું દેવ-શાસ્ત્ર-ગુરુની સાક્ષીએ ક્ષમાયાચના કરું અને કલમને વિરામ આપું છું તથા ભાવના ભાવું છું કે હું સુવર્ણપુરીની સેવાને માટે હંમેશા તત્પર રહીશ અને સુવર્ણપુરીની ધૂળને માથા પર ચડાવવાને પોતાનું સૌભાગ્ય માનીશ.

પંડિત શ્રી નીતિનભાઈ શેઠ

વાંકાનેર, ગુજરાત

પૂજ્ય ગુરુદેવશ્રી તથા પૂજ્ય ભગવતીમાતાની પાવન સાધનાભૂમિમાં ઉજવાયેલ પંચકલ્યાણક પ્રતિષ્ઠા મહોત્સવ જીવનનો અવિસ્મરણીય લ્હાવો હતો. ભગવાનના પાંચ કલ્યાણકને નિજ હૃદયમાં સ્થાપના માટેનો તથા જીવન સાફલ્યનો પુરુષાર્થપ્રેરક, અનુપમ, મંગળ સુપ્રભાત સમાન જ્ઞાન દીપકને પ્રગટાવનારો ઉત્સવ બની રહ્યો, જે નિ:સંશય હકીકત છે. હૃદયની ઉર્મિઓ સાથે, સુખદ સ્વપ્નો અને આત્મિક અતીન્દ્રિય રસને પામવા નવી ક્ષિતિજો તરફ પ્રયાણ કરાવનાર આ પંચકલ્યાણક માંગલ્યનો સુઅવસર રહ્યો. આ મંગળ અવસર આપણા સૌ માટે સમ્યક રત્નત્રયની પ્રાપ્તિમાં નિમિત્ત બને, અને સંસાર સમુદ્રમાંથી પાર ઉતરીએ એવી હૃદયભીની ભાવના સાથે વિરમું છું.

પંડિત શ્રી શૈલેષભાઈ શાહ

અમદાવાદ, ગુજરાત

સ્વર્ણ સમાન સુવર્ણપુરીનો પંચકલ્યાણક પ્રતિષ્ઠા મહોત્સવ

જેમ ગ્રંથાધિરાજ સમયસારની ૧૭-૧૮ ગાથામાં અનુભૂતિસ્વરૂપ ભગવાનઆત્માનું આબાળ-ગોપાળ સૌને જણાઈ રહ્યાની વાત આવી છે તેવી જ રીતે સોનગઢની સર્વના હૃદયમાં અમીટ છાપ છોડી જવાવાળી આ પ્રતિષ્ઠાએ આબાળ-ગોપાળ એટલે કે નાનાથી મોટા સૌને અને અભ્યાસીથી નવીન શ્રોતા દરેકને માટે જીવનમાં આગળ વધવાનો સંદેશ આપી તેનું સાર્થકપણું સિદ્ધ કર્યું છે. જેમ ચંદન ઘો દિવાલ સાથે ચોંટેલી રહે છે તેમ આખા દિવસના બધા જ કાર્યક્રમમાં મુમુક્ષુજીવો અત્યંત ઉત્સુકતાથી ચોંટીને લાભ લેતા સૌએ નજરે નિહાળ્યું છે. આ પ્રતિષ્ઠામાં ચારે અનુયોગનો સંગમ જોવા મળતો હતો જેમકે શ્રી બાહુબલી મુનીન્દ્રની પ્રતિમામાં ચરણાનુયોગ અને પ્રથમાનુયોગના દર્શન થતા હતા જ્યારે જમ્બૂદ્વીપની રચનામાં કરણાનુયોગના દર્શન થતા હતા અને જે ભૂમિ પર આ પંચકલ્યાણકનો પ્રસંગ ઉજવાયો તે ભૂમિ તો દ્રવ્યાનુયોગનું જ ધામ છે. બધા જ કાર્યક્રમમાં પણ ચારે અનુયોગનો સુમેળ જોવા મળ્યો. દેશ-વિદેશના હજારો મુમુક્ષુઓની હાજરી તેમજ ઓનલાઈન લાખો જીવોએ તેનું રસ પાન કરીને તેની લોકપ્રિયતાને જાહેર કરેલ છે.

પંડિત શ્રી દેવેન્દ્રકુમાર જૈન

બિજૌલિયાં, રાજસ્થાન

મુક્તિનો મંગળ મહોત્સવ : પંચકલ્યાણક

જિનેન્દ્રદેવના પંચકલ્યાણક મહોત્સવ નરથી નારાયણ, પશુથી પરમેશ્વર, પામરથી પરમાત્મા થવાનો લોકોત્તર મંગળ મહોત્સવ હોય છે. સોનગઢમાં આયોજિત આ કાર્યક્રમની સર્વાધિક મહત્વપૂર્ણ વિશેષતા એ રહી કે આ મહોત્સવમાં પૂજ્ય ગુરુદેવશ્રી દ્વારા પ્રતિપાદિત આધ્યાત્મિક તત્ત્વજ્ઞાન ભરપૂર માત્રામાં પીરસવામાં આવ્યું. પૂજ્ય ગુરુદેવશ્રીના મંગળ પ્રવચન હોય કે પૂજ્ય બહેનશ્રીની આધ્યાત્મિક તત્ત્વચર્ચા, મહોત્સવમાં સમાગત વિદ્વાનોના પ્રવચન હોય કે ઇન્દ્રસભા, રાજસભા, માતા-દેવીઓની ચર્ચા આદિ બધામાં કલ્યાણકારી આધ્યાત્મિક તત્ત્વજ્ઞાનની જ પ્રધાનતા હતી. અત્યંત અનુશાસિત અને દરેક કાર્યક્રમની સમયબદ્ધતા પૂજ્ય ગુરુદેવશ્રીની ઉપસ્થિતિનો અહેસાસ કરાવતી હતી. હજારોની સંખ્યામાં પધારેલ સાધર્મીજનોએ આ ભવ્ય પંચકલ્યાણકનો લાભ લીધો સાથે ઓનલાઈનના માધ્યમથી પણ લાખો સાધર્મીજનો આ મહોત્સવ સાથે સંકળાયેલ રહ્યા. દરેકના મોઢે મુખ્યરૂપે એમ સાંભળવામાં આવ્યું કે આવા પંચકલ્યાણક મહોત્સવ સંભવિત અમારા જીવનનો અંતિમ મહોત્સવ જાણે હોય.

જિનેન્દ્રભક્તિ, પૂજન, પંચકલ્યાણકની વિધિ, આહારદાનનો પ્રસંગ, સમવસરણની રચના અને તેમાં પૂછાયેલ પ્રશ્નોનું પૂજ્ય ગુરુદેવશ્રીની મધુરધ્વનિમાં પ્રસારણ મનને મોહી રહ્યું હતું. સંસ્કૃતમાં યાગમંડળ વિધાનની ભવ્યતમ પ્રસ્તુતિ, સોળ સ્વપ્નનું આબેહૂબ પ્રદર્શન, પારણાઝૂલન આદિ કાર્યક્રમ અત્યંત પ્રભાવક હતા. કાર્યક્રમની મુખ્ય વિશેષતા એ પણ રહી કે પૂરા પંચકલ્યાણક પ્રતિષ્ઠા મહોત્સવ દરમ્યાન કોઈપણ પ્રકારની બોલી કે ધનસંબંધી કોઈપણ જાહેરાત મંચના માધ્યમથી કરવામાં આવી નહોતી જે પૂજ્ય ગુરુદેવશ્રી દ્વારા ‘ધનને ધૂળ’ કહે છે તેનો અહેસાસ કરાવતી હતી.

દરેક ટ્રસ્ટીગણ અને કાર્યકર્તાઓએ જે આત્મીય ભાવથી પધારેલ આત્માર્થીજનોનું સ્વાગત કર્યું તે પૂજ્ય ગુરુદેવશ્રી દ્વારા પ્રસ્તુત સાધર્મી વાત્સલ્યનું અનુપમ ઉદાહરણ પ્રસ્તુત કર્યું હોય તેમ પ્રતીતિ થઈ. અંતમાં આ મહામંગળમય મહોત્સવમાં સામેલ થવાનું મને સૌભાગ્ય પ્રાપ્ત થયું તે મારા જીવનનો અવિસ્મરણીય પ્રસંગ છે. જેને જીવનના અંત સુધી ભૂલવું એ સહજ સંભવ નથી.

પંડિત શ્રી અતુલભાઇ કામદાર

હૈદરાબાદ, તેલંગાના

| નમઃ સમયસારાય નમઃ |

પરમ કૃપાળુ પૂજ્ય ગુરુદેવશ્રી અને ધન્યાવતાર પૂજ્ય ભગવતી માતાની સાધનાભૂમિમાં મંગળમય પંચકલ્યાણક મહોત્સવ અતિ ભવ્યાતિભવ્ય ઉજવાણો. જ્યાં કણ-કણમાં ભગવાન આત્માનો ગૂંજારવ કાને પડતો હોય, જ્યાં પગ મૂકતા અસંખ્યાત આત્મપ્રદેશે ઝણઝણાટી થતી હોય, જ્યાં પામરમાંથી પરમાત્મા થવાના ભાવો ક્ષણે-ક્ષણે અંતરમાં ઉછળતા હોય અને પૂજ્ય ગુરુદેવશ્રી, પૂજ્ય માતાજી અને સુવર્ણપુરી પ્રત્યે સંપૂર્ણ સમર્પણતા, ભક્તિ ધરાવનાર ભક્તો દ્વારા જેનું સંચાલન થયું હોય તે મહોત્સવની મહિમાનું વર્ણન કરવા હું તો નહીં પણ સાક્ષાત સરસ્વતી દેવી પણ અસમર્થ છે. પૂજ્ય માતાજીના હૃદયોદ્ગાર હતા, પૂજ્ય ગુરુદેવશ્રીની અત્યારે તો જાહોજલાલી છે પણ આ કાળના અંત સુધી રહેશે. “જે જીવશે તે જોશે.”

જય ગુરુદેવ…જય ભગવતીમાતા…જય સુવર્ણપુરીધામ…જય જિનેન્દ્ર

પંડિત શ્રી અશ્વિનભાઈ શાહ

મુંબઈ, મહારાષ્ટ્ર

શ્રી આદિનાથ દિગંબર પંચ કલ્યાણક પ્રતિષ્ઠા મહોત્સવ ખૂબ જ હર્ષોલ્લાસથી મનાવ્યો. આ મંગળ મહોત્સવ સંબંધી મારા પ્રતિભાવ રજૂ કરી રહ્યો છું.

આગમમાં કહ્યું છે કે “ભગવંતોના પંચકલ્યાણક મહોત્સવ આત્મહિતમાં નિમિત્ત બનતા હોય છે.” આ કથન આ મહોત્સવમાં સાર્થક થતું લાગ્યું. કેમ કે ત્યાં પૂજ્ય ગુરુદેવશ્રીના દિવ્યધ્વનિ સમાન પ્રવચન, પૂજ્ય બહેનશ્રીની તત્ત્વચર્ચા તથા અનેક વિદ્વાનો દ્વારા કરવામાં આવેલા વ્યાખ્યાનો દ્વારા સ્વાધ્યાયનો લાભ તો હતો જ તદુપરાંત ત્યાં આયોજિત પ્રક્ષાલ, પૂજન તથા સ્ટેજના પ્રોગ્રામ, રાજસભા, ઇન્દ્રસભા, નાટિકા, નૃત્ય, ભક્તિ એમ બધા જ પ્રોગ્રામોમાં ભેદજ્ઞાનનું પોષણ થાય એ રીતે રજૂ કરવામાં આવેલા. તથા સ્ટેજ પર જે બહેનોએ પાત્ર નિભાવ્યા તેમનું ડ્રેસિંગ પણ જૈનશાસનની આમ્નાય અનુસાર શીલ દોષ ન લાગે એવી સાવધાની વર્તીને તૈયાર થયેલા. જેથી પૂજ્ય ગુરુદેવશ્રીની હાજરીમાં થયેલ પંચકલ્યાણકોની યાદ આવી.

તથા દરેક પ્રસંગમાં ભોજનથી લઈ આવાસ, યાતાયાત (ટ્રાન્સપોર્ટ) આદિ બધી જ વ્યવસ્થામાં સ્વચ્છતા, શિસ્તતા, સાધર્મી વાત્સલ્યભાવના જોઈ મુમુક્ષુઓની બાહ્યપાત્રતાનો પરિચય અપાવ્યો.

પૂરી પ્રતિષ્ઠામાં એ વાતનો અહેસાસ થતો હતો કે જાણે કે દરેક જીવ આ પરમાત્મા બનવાની વિધિની ટ્રેનિંગ લઈ રહ્યો હોય. અને પૂજ્ય ગુરુદેવશ્રી તથા પૂજ્ય બહેનશ્રીની સાધના ભૂમિની ગરિમા વધારવામાં યોગદાન આપી રહ્યા હોય.

દરેક આત્માર્થીઓના ચહેરા ઉપર એક જ વાત ઝલકતી હતી કે હવે સંસાર બહુ થઈ ગયો. બસ થઈ ગયો. અજ્ઞાન સાથે એક ક્ષણ પણ રહેવું ઠીક નથી. આ ભવમાં અજ્ઞાન તો મટાડવું જ છે તથા મોક્ષ માટે જીવનપર્યંત પૂજ્ય ગુરુદેવશ્રીથી મળેલ માર્ગદર્શન માટે ઉપકારના ઉપહારના રૂપમાં આત્માનુભૂતિથી કંઈ ઓછું ના પોષાય. માટે સમ્યગ્દર્શનપૂર્વક આ ભવથી વિદાય લેવાની પ્રતિજ્ઞા કરવી જોઈએ, એવી ગંભીરતા, પ્રસન્નતા બધા જીવોના ચહેરા પર છતી થતી હતી. તથા આત્માર્થીઓ સાથે ચર્ચાઓમાં આ વાત ઝલકતી હતી.

કુલ મળીને સુવર્ણપુરી તથા ત્યાંના આપણા તમામ ધર્માયતનોની ધરોહર પંચમકાળના અંત સુધી આ સત્ય દિગંબર વીતરાગી ધર્મની પ્રભાવનામાં અચૂક નિમિત્ત બનશે જ. આ કાંઈ અતિરેક નથી. મારા અંતરંગ હૃદયની ખરેખરી ભાવના છે. શ્રદ્ધા છે.

જય જિનેન્દ્ર

પંડિત શ્રી રાજેન્દ્રકુમારજી જૈન

જબલપુર, મધ્ય પ્રદેશ

સોનગઢ! પૂજ્ય ગુરુદેવશ્રીની સાધનાભૂમિ! નામ સાંભળતા જ અંતરમાં હર્ષોલ્લાસ ઉછળવા લાગે છે. સર્વ પ્રથમ બિરાજિત સીમંધર ભગવાનની અતીવ ભાવવાહી વીતરાગી મુદ્રા – જેને જોતા જ અંતરમાં જોવા યોગ્ય નિજ આત્મા પ્રતિભાસિત થવા લાગે છે. એવી જ રીતે અત્યંત નવીન વર્તમાનમાં બિરાજમાન થયેલ શ્રી બાહુબલી મુનીન્દ્ર – તેમની પણ અત્યંત ભાવવાહી વીતરાગી મુદ્રા ‘કેવળ નિજ આત્માની જ આરાધના કરવા યોગ્ય છે’ તે એકમાત્ર શિક્ષા આપે છે. આ ઉપરાંત હમણાં જ બિરાજમાન થયેલા જમ્બૂદ્વીપની રચનાના સર્વ જિનબિંબ અત્યંત મનોહારી અને વીતરાગ ભાવવાહી છે જે આત્મ કલ્યાણની પ્રેરણા આપે છે – આવા સેંકડો જિનબિંબોથી સોનગઢની ધરા અત્યંત પવિત્ર થઈ ગઈ છે. તત્ત્વજ્ઞાનની અદ્‍ભુત વાતો – જે આજ સુધી ગૂંજાયમાન છે તથા અદ્‍ભુત જિનબિંબોના દર્શન – આરાધકોની આત્મસાધના માટે પર્યાપ્ત છે. ધન્ય છે પૂજ્ય ગુરુદેવશ્રી! ધન્ય છે સોનગઢ! અને સૌથી ધન્ય છે તો આ તત્ત્વજ્ઞાન! જે સોનગઢની ઓળખાણ છે.

પંડિત શ્રી નિલેષભાઈ શાહ

મુંબઈ, મહારાષ્ટ્ર

દિગંબર સમાજના સાતિશય પુણ્યના ઉદય પ્રતાપે સુવર્ણપુરી સોનગઢ મુકામે પૂજ્ય ગુરુદેવશ્રીના શાસનકાળના પ્રભાવના યોગના નિમિત્તે થયેલ બીજી વારની પ્રતિષ્ઠામાં જે લાભ પ્રાપ્ત થયેલ છે તે અવર્ણનીય છે.

આગમ અને અધ્યાત્મના સમન્વય દ્વારા સંપૂર્ણ સુવર્ણપુરી સોનગઢને ‘અયોધ્યા’ જે જન્મભૂમિ, ‘હસ્તિનાપુર’ જે તપોભૂમિ, ‘કૈલાશ પર્વત’ જે નિર્વાણભૂમિના રૂપમાં પરિવર્તિત કરીને સોનગઢના પદાધિકારીઓ, ટ્રસ્ટીગણ, તેમજ કાર્યકર્તાઓએ, મુમુક્ષુજનને પ્રથમાનુયોગના દર્શન કરાવ્યા છે.

આ તમામ વડીલ બંધુઓએ સોનગઢ પ્રતિષ્ઠામાં પધારેલ સર્વ મુમુક્ષુઓને પ્રવચન વાત્સલ્ય, વૈયાવૃત્તિ, માર્ગપ્રભાવના, અરિહંતભક્તિ ઈત્યાદિ ભાવનાઓ દ્વારા ચરણાનુયોગના દર્શન કરાવ્યા છે.

લગભગ હજાર વર્ષ બાદ કાયોત્સર્ગ મુદ્રામાં ધ્યાનસ્થ બાહુબલી મુનીન્દ્રની પ્રતિમા બિરાજમાન કરી (જે ધ્યાન દ્વારા અસંખ્યાતગુણશ્રેણી કર્મોની નિર્જરા દ્વારા નિર્વાણપદની પ્રાપ્તિ થાય છે) કરણાનુયોગના દર્શન કરાવ્યા છે.

સમવસરણમાં બિરાજમાન તીર્થંકર આદિનાથની દિવ્યધ્વનિમાં જીવને માટે સંપૂર્ણપણે હિતકારી એવા સમ્યગ્દર્શન અને તેને પ્રાપ્ત કરવાની વિધિ દર્શાવી છે. જે પૂજ્ય ગુરુદેવશ્રીના પ્રવચનના અને પૂજ્ય ભગવતીમાતાજીની તત્ત્વચર્ચાના માધ્યમથી દ્રવ્યાનુયોગના દર્શન કરાવ્યા છે.

આમ સુવર્ણપુરી સોનગઢ મુકામે જે આ પ્રતિષ્ઠા મહોત્સવ યોજેલ તેમાં વિશ્વના સમસ્ત મુમુક્ષુજનોને ચારે અનુયોગના સ્વાધ્યાયનો લાભ અપાવી, સોનગઢ બંધુઓ કે જેઓએ અરિહંત ભગવાનના સેવક થઈ સમાજને જે યોગદાન આપ્યું છે, તે ઉપકારનો પ્રતિઉપકાર વાળવા સમાજ અસમર્થ છે. નવયુવક-યુવતીના સાથ સહકાર સાથેની આ પ્રતિષ્ઠા બીજી અનેક પ્રતિષ્ઠાને દિશા આપવાનું કામ કરશે.

સર્વ સાધર્મીજનોને અલ્પકાળમાં મુક્તિની પ્રાપ્તિ થાય એવી ભાવના સાથે…

પંડિત શ્રી રજનીભાઈ દોશી

હિંમતનગર, ગુજરાત

આપણા મુમુક્ષુઓની માતૃભૂમિ-જન્મભૂમિ સોનગઢમાં આયોજિત પંચકલ્યાણક પ્રતિષ્ઠા મહોત્સવની ભવ્યતા શબ્દોમાં વર્ણવી શકાય તેમ નથી. વિશ્વના તમામ મુમુક્ષુઓના કેન્દ્ર એવા સુવર્ણપુરી સોનગઢનો પંચલ્યાણક પ્રતિષ્ઠા મહોત્સવ તેની ગરિમા, વૈશ્વિક પ્રતિષ્ઠા અને ભવ્યતા સાથે સંપન્ન થયો.

ભગવાન બાહુબલીની વિશાળ પ્રતિમા સાથે જંબુદ્વીપની પ્રતિમાઓ સ્થાપિત કરવાની આ ઘટના સમગ્ર વિશ્વમાં દિગંબર ધર્મના અનુયાયીઓ માટે એક ઉદાહરણ છે. એક તરફ પંચકલ્યાણકના મંચની ભવ્યતા, આયોજિત કાર્યક્રમ, ચારેય અનુયોગોને સમાવતી સાંસ્કૃતિક પ્રસ્તુતિ, “આનંદ ભયો….” “આજ મૈં ધન્ય હુઇ….” આદિ અનેક કાળજયી પ્રસ્તુતિ, પ્રાંગણમાં ૫૧ ફીટની કદાવર આશીર્વાદ આપતી પૂજ્ય ગુરુદેશ્રીની પ્રતિકૃતિ (સ્ટેન્ડ સાથે), ભક્તોની અદ્દભુત શિસ્ત, ૧૦૦૦ કાર્યકર્તાઓની સમર્પણભાવે સેવા, સમગ્ર પ્રાંગણમાં આધ્યાત્મિકતાની વર્ષા – બધું જ અનોખું હતું.

પૂજ્ય ગુરુદેવશ્રીની સાધના ભૂમિ ખાતે આયોજિત આ કાર્યક્રમના સાક્ષી બનવું એ એક મોટો લહાવો છે. ભવ્ય કાર્યક્રમો વચ્ચે, પૂજ્ય ગુરુદેવશ્રીના ઉપદેશો, પૂજ્ય બહેનશ્રીના તત્ત્વજ્ઞાન અને આધ્યાત્મિકતા સંબંધીના વિદ્વાનોના સ્વાધ્યાયોએ કાર્યક્રમને આધ્યાત્મિક ઊંચાઈ આપી. દેશ-વિદેશના સેંકડો વિદ્વાનો અને હજારો ધર્મપ્રેમીઓની હાજરી આધ્યાત્મિક સુવર્ણપુરીને “સોનગઢ આપણું રે કહેવાય, તેને કોઇ દિ ના ભૂલાય”નો અહેસાસ કરાવતી હતી. પૂજ્ય ગુરુદેવશ્રીના વિશાળ વ્યક્તિત્વ અને દોષરહિત આધ્યાત્મિકતાએ પ્રદેશ, ભાષા અને જાતિના ભેદોને દૂર કર્યા.

નિઃશંકપણે આ પ્રસંગ આવનારા ઘણા વર્ષો સુધી જિનશાસન પ્રેમીઓની યાદગાર સ્મૃતિ બની રહેશે…